دوای دوو رۆژی پڕ لە چالاكی، كۆنفرانسی شەشەم كۆتایی بە كارەكانی هێنا
Search

دوای دوو رۆژی پڕ لە چالاكی، كۆنفرانسی شەشەم كۆتایی بە كارەكانی هێنا


2018-04-27 (هەینی) [ زانکۆی گەشەپێدانی مرۆیی ]

دوای ئەوەی رۆژی چوار شەممە 25/4/2018 و لە رێورەسمێكی شایستەدا شەشەمین كۆنفرانسی زانستی زانكۆی گەشەپێدانی مرۆیی دەستی بەكارەكانی كرد، دوای نیوەڕۆی ئەمڕۆ 26/4/2018 دوای دوو رۆژی پڕ لە چالاكی و خستنەڕووی دەیان توێژینەوەی گرنگ، كۆنفرانسی شەشەمی زانستی زانكۆی گەشەپێدانی مرۆیی بەسەركەوتوویی كۆتایی هات، لە ماوەی ئەم دوو رۆژەدا هۆڵەكانی تایبەت بە كۆنفرانس بەردەوام جمەی دەهات لە توێژەرو مامۆستایانی و میوانان، كە هەمووان بە پەرۆشەوە بۆ گفتوگۆی توێژینەوەكان ئامادەییان هەبوو.

لەم بارەیەوە بەڕێز پڕۆفیسۆر د. مەریوان احمد رەشید سەرۆكی زانكۆی گەشەپێدانی مرۆیی بە سایتی زانكۆی راگەیاند: زانكۆی گەشەپێدانی مرۆیی وەك هەمیشە پێشەنگ بووە لە كاری ئەكادیمی و زانستی، كۆنفرانسی زانستی ساڵانەی زانكۆش یەكێكە لەو چالاكییە زانستی و ئەكادیمیانەی زانكۆ، كە ماوەی چەند ساڵێكە لەسەر داوای راستەوخۆی بەڕێز پڕۆفیسۆر د. عەلی قەرەداغی سەرۆكی ئەنجوومەنی ئەمینداریەتی زانكۆو، بە پاڵپشتی بەڕێزیان بەردەوامی هەیە. سوپاس بۆ خوا ئەمساڵیش سەرەڕای ناهەمواری بارودۆخی هەرێمی كوردستان توانیمان سەركەوتووانە كۆنفرانسەكەمان بە ئەنجام بگەیەنین. هەروەها دەربارەی ئەنجامی توێژینەوەكان بەڕێز سەرۆكی زانكۆ وتی: ئێمە دوای تەواوبوونی كارەكانی كۆنفرانس راسپاردەو ئەنجامەكان ئامادە دەكەین و دواتریش توێژینەوەكان بە پێی گرنگی و كاریگەرییان ریزبەندی دەكەین، لەبەر ئەوەی كە كۆنفرانسی ئەمساڵ زیاتر تایبەت بووە بە بواری كارگێڕی و دارایی، بۆیە هيوادارين كە وەزارەتی خوێندنی باڵاو توێژینەوەی زانستی بۆ راسپاردە كان به پێی توانا كارى لەسەر بكات. هەروەها هەوڵ ئەدەین كە  توێژینەوەكانى كۆنفرانس بگەیەنین بە كۆمپانیا و دامەزراوەكانی كەرتی تایبەت بۆ پراكتیك كردن و كار لەسەركردنی.

هەروەها بەڕێز پرۆفیسۆری یاریدەدەر د. محسن ابراهیم احمد، سەرۆكی لیژنەی ئامادەكاری كۆنفرانس بە سایتی زانكۆی راگەیاند كە دوای نیوەڕۆی ئەمڕۆ دوای ئەوەی سەرجەم توێژینەوەكانی كۆنفرانس كە ژمارەیان 67 توێژینەوەی جۆراوجۆر بوون لە ماوەی دوو رۆژی كۆنفرانسدا خرانەڕوو، كارەكانی كۆنفرانس بە كۆتا هاتن، وا بڕیاریشە لە نزیكترین كاتدا ئەنجوومەنی زانكۆ بڕیار بدات لەسەر راسپاردەكانی كۆنفرانس و بڵاوكردنەوەی توێژینەوەكان لە گۆڤاری زانستی زانكۆ.

شایانی باسە زانكۆی گەشەپێدانی مرۆیی ساڵانە چەندین كۆنفرانس و پانێڵ و چالاكی زانستی لەخۆ دەگرێت كە سەدان توێژەرو لێكۆڵەر لە زانكۆ جیاوازەكانەوە بەشداری تیادا دەكەن.

uhd.edu.iq : زانکۆی گەشەپێدانی مرۆیی

uhd.edu.iq : زانکۆی گەشەپێدانی مرۆیی

uhd.edu.iq : زانکۆی گەشەپێدانی مرۆیی