پرۆژەی هاوبەشی زانكۆو وەزارەتی كار بۆ خوێندنی گەنجان راگەیەنرا
Search

پرۆژەی هاوبەشی زانكۆو وەزارەتی كار بۆ خوێندنی گەنجان راگەیەنرا


2017-07-18 (سێشەم) [ زانکۆی گەشەپێدانی مرۆیی ]

پرۆژەی (نازدارانیش مافیان لەسەرمان هەیە) ناونیشانی ئەو پرۆژەیەیە كە ئەمڕۆ 18/7/2017 وەزارەتی كارو كاروباری كۆمەڵایەتی بە هاوبەشی لەگەڵ سێ زانكۆی تایبەت لە شاری سلێمانی رایانگەیاند.
سەرلەبەیانی ئەمڕۆ وەفدێكی زانكۆی گەشەپێدانی مرۆیی كە پێكهاتبوون لە بەڕێزان د. ئەمجەد محمد/ سەرۆكی بەشی كارگێڕی كارو م. نەجات حەسەن قەرەداغی/ بەڕێوەبەری راگەیاندن و روناكبیری زانكۆ، بە نوێنەرایەتی سەرۆكی زانكۆ بەشداریان كرد لە ڕێورەسمی واژۆكردنی پرۆژەیەكی هاوبەشی بەڕێوەبەرایەتی گشتی چاودێری و گەشەپێدانی كۆمەڵایەتی شاری سلێمانی و سێ زانكۆی تایبەتی سلێمانی، پرۆژەكە بە سەرپەرشتی و ئامادەبوونی بەڕێز د. محمد هاودیانی وەزیری كارو كاروباری كۆمەڵایەتی و م. عومەر گوڵپی بەڕێوەبەری گشتی چاودێری و گەشەپێدانی كۆمەڵایەتی راگەیەنرا، مەبەست لە پرۆژەكە بریتییە لە دابینكردنی كورسی خوێندن بۆ خوێندكارانی خانەكانی بێ سەرپەرشت كە قۆناغی ئامادەیی تەواو دەكەن، ئەمەش بەپێی رێنمایی و مەرجەكانی وەزارەتی خوێندنی باڵاو بە پاڵاوتنیان لە لایەن بەڕێوەبەرایەتی گشتی چاودێری و گەشەپێدانی كۆمەڵایەتی.
لە وتەیەكدا بۆ دەزگاكانی راگەیاندن بەڕێز د. ئەمجەد محمد وتی: زانكۆی گەشەپێدانی مرۆیی وەك هەمیشە لە بیری خزمەتكردندایە بە گشت چین و توێژەكانی كۆمەڵگە، زانكۆكەمان بە چەندین شێواز هاوكاری خوێندكارانی كەم دەرامەتی كردووە لە ساڵانی رابردوو، ئێستاش لە رێگای ئەم پرۆژەیەوە دوو خوێندكار وەردەگیرێن و لە سەرجەم تێچووی خوێندنیان تا تەواوكردنی خوێندنی زانكۆ دەبەخشرێن، ئەمەش وەك دیاری و هاوكاریەك لە لایەن بەڕێز سەرۆكی ئەنجوومەنی ئەمینداریەتی زانكۆ جەنابی پڕۆفیسۆر د. عەلی قەرەداغیەوە دابین كراوە.
لە لای خۆیەوە بەڕێز د. محمد هاودیانی وەزیری كارو كاروباری كۆمەڵایەتی دوای خستنەڕووی وردەكاری پرۆژەكە، سوپاسی هەر سێ زانكۆی بەشداری كردو ئەوەی خستە روو كە بەدەمەوە هاتنی ئەم زانكۆیانە بۆ پرۆژەیەكی لەم شێوەیە نیشانەی خەمخۆری و زانست دۆستی ئەم زانكۆیانەیە.
شایانی باسە زانكۆی گەشەپێدانی مرۆیی ساڵانە چەندین خوێندكار لە كرێی خوێندنی ساڵانە دەبەخشێت، لەوانە خوێندكارانی سەركەوتووی قۆناغ و بەشەكان، خوێندكارانی كەم دەرامەت، خوێندكارانی كوردانی رۆژئاوا، ئەم پرۆژەیەش بۆ ئەمساڵی خوێندن دەبێتە بەشێكی تر لەو خزمەتانەی زانكۆ پێشكەشی دەكات بە كۆمەڵگای كوردستانی.

uhd.edu.iq : University of Human Development

uhd.edu.iq : University of Human Development

uhd.edu.iq : University of Human Development

uhd.edu.iq : University of Human Development

uhd.edu.iq : University of Human Development