وەزیری خوێندنی باڵا: هیوادارین راسپاردەكانی ئەم كۆنفرانسە ڕۆڵی هەبێت لە دۆزینەوەی چارەسەر بۆ كێشەكانی كوردستان و ناوچەكە
Search

وەزیری خوێندنی باڵا: هیوادارین راسپاردەكانی ئەم كۆنفرانسە ڕۆڵی هەبێت لە دۆزینەوەی چارەسەر بۆ كێشەكانی كوردستان و ناوچەكە


2017-04-08 (شەممە) [ زانکۆی گەشەپێدانی مرۆیی ]

سەرلەبەیانی ئەمڕۆ بەڕێزد. یوسف گۆران وەزیری خوێندنی باڵاو توێژینەوەی زانستی هەرێمی كوردستان، بەشداری كرد لە رێورەسمی دەستپێكردنی چوارەمین كۆنفرانسی زانستی زانكۆی گەشەپێدانی مرۆیی، لە میانەی وتەیەكدا بەڕێزیان سەرەتا دەستخۆشی و سوپاسی خۆی بۆ زانكۆی گەشەپێدانی مرۆیی دووپات كردەوە بە بۆنەی بەستنی چوارەمین كۆنفرانسی زانستی زانكۆ كە وەك بەڕێزیان وتی لە ئێستادا بووەتە نەریتێكی ساڵانە.

پاشان بەڕێزیان ئاماژەی بەوە كرد كە لە ئێستادا ئەركی زانكۆو ناوەندە زانستییەكان گۆڕاوەو ئەگەر لە سەدەكانی پێشوودا ئەركی زانكۆكان تەنها فێركردن و زانست بووبێت، ئەوا لە ئیستادا و لە سەدەی بیست و یەكدا ئەركی زانكۆكان قورستتر بووەو جگە لە ئەركی فێركردن و بەرهەمهێنانی مەعریفە و توێژینەوەكان، ئەركی سەرەكیان بووە بە گرێدانی زانكۆ بە بازاڕی كارو كێشەكانی كۆمەڵگە. لە ئێستادا زانكۆكان تەنها خوێندكاران فێر ناكەن چۆن كار بكەن، بەڵكو خوێندكاران بەرەو كاری داهێنەرانەو بەشداری كردن لە گەشەپێدانی كۆمەڵگە هان دەدەن.

لە بەشێكی تری وتەكانیدا ئەوەی خستە ڕوو كە لە ئێستادا ئێمە تەنها قسە لەسەر ژمارەی توێژینەوەكان ناكەین، بەڵكو جۆرو كوالێتی توێژینەوەكانیش بوونەتە خاڵێكی گرنگی هەڵسەنگاندن و ناسینی زانكۆكان. لەم بوارەشدا مایەی دڵخۆشییە كە زانكۆكانمان توێژەری باش و بەتوانایان تیادا دەركەوتووە.

لە كۆتایی وتەكانیشیدا بەڕێز د. یوسف گۆران وەزیری خوێندنی باڵاو توێژینەوەی زانستی هیوای خواست كە راسپاردەكانی ئەم كۆنفرانسە بتوانێت رۆڵێك ببینێت لە دۆزینەوەی رێگەچارەی سیاسی و یاسایی و كارگێڕی بۆ كێشە كەڵەكە بووەكانی كوردستان و ئێراق و ناوچەكە. هەروەك هیوای خواست كە توێژەرو لێكۆڵەرەكانی كۆنفرانس بتوانن نێردەی ئاشتی و ئاوەدانی و پێكەوەژیان بن لە وڵات و كۆمەڵگاكانی خۆیاندا.

uhd.edu.iq : University of Human Development