هەواڵەکان

وەزیری خوێندنی باڵاو توێژینەوەی زانستی سەردانی زانكۆی گەشەپێدانی مرۆیی دەكات

 ئێوارەی ئەمڕۆ 30/11/2016 بەڕێز د. یوسف گۆران وەزیری خوێندنی باڵاو توێژینەوەی زانستی سەردانی زانكۆی گەشەپێدانی مرۆیی كردو لە لایەن بەڕێز پ.د. مەریوان احمد رەشید و ئەنجومەنی زانكۆوە بە گەرمی پێشوازی لێكرا. 

لە دیدارێكدا بەڕێز وەزیری خوێندنی باڵاو توێژینەوەی زانستی پیرۆزبایی و دەستخۆشی خۆی بۆ زانكۆی گەشەپێدانی مرۆیی دەربڕی بە بۆنەی بەدەستهێنانی پلەی یەكەم بۆ ساڵی دووەم لەسەر یەك لە ئاستی زانكۆ ئەهلیەكانی كوردستان. 

هەر لەو دیدارەدا بەڕێزیان تیشكی خستە سەر رۆڵی بەرچاوی زانكۆكانی كەرتی تایبەت لە خزمەتكردن بە بواری خوێندن لە كوردستانداو لەم بوارەشدا داوای كرد كە هەماهەنگی و هاوكاری زانكۆكان و وەزارەت زیاتر بەرەوپێش ببرێت بۆ خزمەتكردن بە خوێندكارانی كوردستان.

لە لایەن خۆیەوە بەڕێز سەرۆكی زانكۆی گەشەپێدان وێڕای بەخێرهاتنی بەڕێزیان، ئەوەی خستە ڕوو كە زانكۆی گەشەپێدانی مرۆیی هەمیشە لەژێر رێنمایی و داواكارییەكانی وەزارەتدا كاری كردووەو هەوڵی داوە بە بەردەوامی كوالێتی خوێندن لە بەرزرترین ئاستدا بهێڵێتەوە. كە ئەمەش هۆكاری سەركەوتنی بەردەوامی زانكۆیە.