هەواڵەکان

رێوڕەسمی پێنجەمین خولی دەرچووانی زانكۆی گەشەپێدانی مرۆیی بەڕێوەچوو

 

ئێوارەی ئەمڕۆ شەممە 1/10/2016 بە ئامادەبوونی بەڕێز پڕۆفیسۆر دكتۆر عەلی قەرەداغی سەرۆكی ئەنجومەنی ئەمینداریەتی زانكۆ، زانكۆی گەشەپێدانی مرۆیی رێوڕەسمی پێنجەمین خولی دەرچووانی خۆی ئەنجامدا.

ڕێورەسمەكە سەرەتا بە هاتنە ژورەوەی كەژاوەی خوێندكارانی كۆلێژەكانی زانكۆو مامۆستایان و ئەنجوومەنی زانكۆ دەستی پێكرد.

پاشان سەرجەم ئامادەبووان ساتێك بۆ گیانی پاكی شەهیدانی كوردستان راوەستان و پێكەوە سرودی نەتەوەیی ئەی رەقیب و مارشی زانكۆی گەشەپێدانیان وتەوە.

دواتر بەڕێز مامۆستا ئەمجەد محەمەد سەرۆكی لیژنەی ئامادەكار وتاری لیژنەی ئامادەكاری خوێندەوە، كە تیایدا وێڕای پیرۆزبایی لە خوێندكارانی دەرچووی زانكۆ، ئەوەی خستە روو كە سەرەڕای ئەو دۆخە ناهەمورەی كە گەلی كوردستان پیایدا تێدەپەڕێت، زانكۆ توانی سەركەوتووانە ساڵێك تەواو بكات و سەدان دەرچووی تر پێشكەش بە گەلەكەمان بكات.

 

(( وتاری لیژنەی باڵای ڕێورەسمی پێنجەمین خولی دەرچوانی زانکۆی گەشەپێدانی مرۆیی)).

 

پاشان بەڕێز پڕۆفیسۆر دكتۆر مەریوان ئەحمەد رەشید سەرۆكی زانكۆ وتارێكی پێشكەشكردو تیایدا ئاماژەی بەوە كرد كە زانكۆی گەشەپێدانی مرۆیی هەر لە سەرەتای دامەزراندنیەوە سەرجەم دام و دەزگاكانی خستۆتە خزمەت پرۆسەی خوێندن و گرنگیدان بە ئاستی خوێندكاران و قوتابیان، كە سەرەڕای كەمی تەمەنی زانكۆ كە هەشت ساڵە دامەرزاوە، توانیویەتی بە شێوەیەكی بەرچاو خۆی بسەلمێنێت و لە پێش هەمووانەوە وەزارەتی خوێندنی باڵا ئەو شایەتیەی بۆ ئەدا.

(( وتاری بەڕێز سەرۆكی زانكۆ)).

 

پاشان بەڕێز سەرۆكی ئەنجومەنی ئەمینداریەتی زانكۆی گەشەپێدانی مرۆیی بەڕێز پڕۆفیسۆر دكتۆر عەلی قەرەداغی وتارێكی پێشكەش كردو تیایدا وێڕای پیرۆزبایی لە خوێندكارانی دەرچووی زانكۆ، ئەوەی خستە روو كە ئەمڕۆ رۆژێكی مێژووییە لە تەمەنی زانكۆ كە كۆمەڵێك خوێندكاری سەركەوتوو لە بوارە جیاوازەكان پێشكەش بە گەل و وڵات دەكات.

هەروەها بەڕێزیان ئەوەی خستە روو كە بنەمای پێشكەوتنی هەر وڵات و میللەتێك راددەی گرنگیدانە بە زانست و زانین، بۆیە گرنگە ئێستا لە هەموو كاتێك زیاتر حكومەتی هەرێم گرنگی بەم بوارە بدات تا ببێتە سەرەتای چارەسەری هەموو كێشەكان.

پاشان بەڕێزیان چەند خاڵێكی بۆ چارەسەری كێشەكانی ئێستای هەرێم خستە روو، وە ئاماژەی بەوەدا لەو بوارەدا بەڕێزیان ئامادەی هەموو هاوكاری و هەماهەنگیەكن.

پاشان سەرجەم خوێندكاران سوێندی دەرچوونیان خواردو پەیمانیان دا كە لە داهاتوودا لە جێبەجێكردنی ئەركەكانیاندا بەرامبەر بە گەل و وڵات ئەمەكدار بن.

لە دوا بڕگەی مەراسیمەكەش بەڕێزان راگری كۆلێژەكانی زانكۆی گەشەپێدانی مرۆیی داوای پێدانی بڕوانامەی بەكالۆریۆسیان كرد بۆ دەرچووانی ئەمساڵی زانكۆو لە لایەن بەڕێز سەرۆكی زانكۆوە بە فەرمی ئەو بڕوانامەیەیان پێ بەخشراو بوونە پێنجەم پۆل لە كاروانی زانست كە زانكۆی گەشەپێدان پێشكەش بە گەلی كوردستانی دەكات.

(( بۆ بینیی تەواوی مەراسیمی دەرچووانی زانكۆی گەشەپێدان كلیك لەم لینكە بكە)).