هەواڵەکان

 زانكۆی گەشەپێدانی مرۆیی دەبێتە ئەندامی ئەنجومەنی زانكۆ جیهانییەكان

 

رۆژی 24/5/2016 لە ئەنقەرەی پایتەختی توركیا وەفدێكی باڵای زانكۆی گەشەپێدانی مرۆیی كە پێكهاتبوو لە بەڕێزان بەڕێزان پڕۆفیسۆر د. مەریوان ئەحمەد رەشید سەرۆكی زانكۆو، پڕۆفیسۆر د. ئەنوەر محەممەد فەرەج راگری كۆلێژی یاساو رامیاری و، د. رەئوف كەریم راگری كۆلێژی زمان، سەردانی بارەگای سەرەكی ئەنجومەنی زانكۆ جیهانییەكانیان (IUC) كرد و لە لایەن بەڕێز (دكتۆر ئۆرهان حكمت ئۆغڵۆ) سەرۆكی ئەنجومەنەكە پێشوازیان لێكرا.

لەو كۆبوونەوەیەدا گفتوگۆی بە ئەندام بوونی زانكۆی گەشەپێدانی مرۆیی لە ئەنجومەنی ناوبراو كرا، لەو بارەیەوە بەڕێز سەرۆكی زانكۆی گەشەپێدانی مرۆیی چەندین داتا و زانیاری پێویستی لەسەر زانكۆ خستە بەردەم سەرۆكایەتی ئەنجومەنی ناوبراوو دوای دیراسەو تاوتوێی داتاو زانیاریەكان، داواكاری زانكۆی گەشەپێدانی مرۆیی بۆ بوونە ئەندام لەو ئەنجومەنە قبوڵ كرا.

لەم بارەیەوە بەڕێز پڕۆفیسۆر د. مەریوان ئەحمەد رەشید تایبەت بە سایتی زانكۆ وتی: بوونە ئەندامی زانكۆی گەشەپێدانی مرۆیی لەم ئەنجومەنە هەنگاوی دیكەی گرنگی بەرەوپێش چوونی زانكۆكەمانە. ئەم ئەنجومەنە كە بە سەدان زانكۆی جیهانی تیایدا ئەندامە و لە هەرێمی كوردستانیش تەنها چەند زانكۆیەك تیایدا ئەندامن دەرگایەكی فراوان بۆ كارو چالاكی ئەكادیمی و زانستی بۆ زانكۆكەمان دەكاتەوە.