ئەرشیفی هەواڵەکان

مامۆستایانی سەركەوتووی پرۆسەی دڵنیایی جۆری خەڵات دەكرێن

 

نیوەڕۆی ئەمڕۆ بەڕێوەبەرایەتی دڵنیایی جۆری زانكۆی گەشەپێدانی مرۆیی، بە سەرپەرشتی بەڕێز پڕۆفیسۆر د. مەریوان أحمد رشید سەرۆكی زانكۆو بە ئامادەبوونی ئەندامانی ئەنجوومەنی زانكۆ، ئەنجامی پرۆسەی دڵنیایی جۆری بۆ ساڵی 2015/2016 خستەڕوو.

لە ڕێوڕەسمێكدا كە لە كەمپی دووی بناری گۆیژەی زانكۆی گەشەپێدانی مرۆیی بەڕێوەچوو، سەرەتا بەڕێز سەرۆكی زانكۆ وتەیەكی پێشكەشی ئامادەبووان كردو تیایدا ئەوەی رونكردەوە كە زانكۆی گەشەپێدانی مرۆیی هەر لە سەرەتای دامەزراندنیەوە گرنگی داوە بە تواناكانی مامۆستاكانی و هەوڵیداوە هەمیشە مامۆستاكانی پێشەنگ بن لە هەموو بوارەكاندا.

هەروەها بەڕێزیان لە بەشێكی تری قسەكانیدا ئاماژەی بەوەدا كە بە رێنمایی و داواكاری بەردەوامی بەڕێز سەرۆكی ئەنجومەنی ئەمینداریەتی زانكۆ پڕۆفیسۆر د. عەلی قەرەداغی كە هەمیشە داوای كردووە زانكۆی گەشەپێدانی مرۆیی و مامۆستاو توێژەرەكانی بەردەوام لە پێشەنگدا بن و لە پرۆسەی زانستخوازی بەردەوام دانەبڕێن، بۆیە ئێمەش بە هەموو شێوەیەك بەردەوام دەبین لە هاندانی مامۆستایانی زانكۆكەمان تا بتوانن باشترین مامۆستا بن و باشترین خزمەت بە خوێندكارانمان بكەن.

لە بەشێكی تری رێورەسمەكەدا بەڕێز د. ئاسۆ محمد دەروێش بەڕێوەبەری دڵنیایی جۆری زانكۆی گەشەپێدانی مرۆیی تیشكی خستە سەر ئەو خاڵانەی كە كراونەتە پێوەر بۆ سەركەوتنی مامۆستایان و بە وردی داتاو ژمارەكانی پەیوەست بە چالاكی مامۆستایان و خاڵبەندی كۆلێژەكانی زانكۆی خستە ڕوو.

لە دوا بڕگەی رێورەسمەكەشدا بەڕێز پ.د. أنور محمد فرج یاریدەدەری سەرۆكی زانكۆ بۆ كاروباری زانستی ناوی مامۆستایانی پێشەنگی راگەیاند لە سەرجەم كۆلێژەكاندا، پاشانیش لە لایەن بەڕێز سەرۆكی زانكۆوە بڕوانامەو دیاری زانكۆ پێشكەش بەو مامۆستا سەركەوتووانەی پارساڵی خوێندنی زانكۆ كرا.