ئەرشیفی هەواڵەکان

وەزارەتی خوێندنی باڵاو توێژینەوەی زانستی خولی پەرەپێدانی توانای ئەكادیمی زانكۆ بەسەر دەكاتەوە

ئێوارەی رۆژی یەكشەممە 5/2/2017 وەفدێكی وەزارەتی خوێندنی باڵاو توێژینەوەی زانستی كە پێكهاتبوون لە بەڕێزان مامۆستا فوئاد عەلی سمایل یاریدەدەری بەڕێوەبەری گشتی توێژینەوەو پەرەپێدان لە وەزارەت، بە یاوەری مامۆستا حەسیب صالح و مامۆستا سەرتیپ سەردانی سەرۆكایەتی زانكۆی گەشەپێدانی مرۆییان كردو لە لایەن بەڕێز پڕۆفیسۆر د. مەریوان ئەحمەد رەشید سەرۆكی زانكۆو هەریەك لە بەڕێزان بەڕێوەبەری كاگێڕی سەنتەرو بەڕێوەبەری نووسینەگەی سەرۆكەوە پێشوازی كران..

وەفدی میوان بە مەبەستی بەدووداچوون و ئاگاداربوون لە شێوازی ئەنجامدانی خولی پەرەپێدانی توانای ئەكادیمی ماۆستایان هاتبوون، كە لە لایەن زانكۆی گەشەپێدانی مرۆییەوە كرابووەوە.

سەرەتای كۆبوونەوەكە بەڕێز سەرۆكی زانكۆ بەخێرهاتنی وەفدی میوانی كردو تیشكی خستە سەر شێوازی كاری زانكۆ كە هەمیشە لە چوارچێوەی رێنماییەكانی وەزارەتدا كارەكانی ئەنجام دەدات.

پاشان لە لایەن بەڕێز سەرپەرشتیاری خولەكەوە كە بەڕێوەبەری كارگێڕی سەنتەری گەشەپێدانە، باسێكی وردی لەسەر شێوازی بەڕێوەچوونی خولی پەرەپێدانی توانای ئەكادیمی مامۆستایان كرد كە زانكۆی گەشەپێدانی مرۆیی لەژێر چاودێری وەزارەت ئەنجامی داوە، لەم بوارەشدا سەرجەم دۆكیومینتە پێویستەكانی خستە بەردەست وەفدی میوان، لە بەرامبەردا وەفدی وەزارەت دەستخۆشی لە سەرۆكایەتی زانكۆو سەنتەری گەشەپێدان و راهێنانی زانكۆ كرد كە بەشێوەیەكی سەركەوتووانە و بە پێی رێنماییەكانی وەزارەت خولەكەیان ئەنجامداوەو بابەتەكانیان گەیاندووە.

لە كۆتاییدا وەفدی ناوبراو لەگەڵ بەڕێز سەرۆكی زانكۆ چەندین پثێشنیازیان تاوتوێ كرد بۆ ئەوەی لە داهاتوودا ببێتە كارنامەی خولەكانی سەنتەری گەشەپێدان لە زانكۆ بۆ پەرەپێدانی توانای ئەكادیمی مامۆستایان. ئەمەو كۆبوونەوەكە نزیكەی كاتژمێرێكی خایاند.