ئەرشیفی هەواڵەکان

 

سەرۆكایەتی زانكۆی گەشەپێدانی مرۆیی: كۆچی زانای پایەبەرز پڕۆفیسۆر د. مستەفا زەڵمی خەسارەتێكی گەورە بوو بۆ زانستخوازانی كوردستان

 

سەرلەبەیانی رۆژی شەممە 4/6/2016 زانای ناوداری كوردو مامۆستای بواری یاساو شەریعەت پڕۆفیسۆر د. مستەفا زەڵمی لە شاری هەولێری پایتەختی هەرێمی كوردستان كۆچی دوایی كرد.

پڕۆفیسۆر د. مستەفا زەڵمی كە یەكێكە لە زاناو بیرمەندەكانی جیهانی ئیسلامیی و خاوەنی چەندین كتێب و توێژینەوەیە لە بواری یاسا و فیقهی ئیسلامییدا، لە ساڵی 1924 لە گوندی زەڵمی سەر بە شارۆچكەی خورماڵ لەدایك بووەو ساڵی 1965 بەكالۆریۆسی لە یاسا لە زانكۆی بەغداد بەدەست هێناوە و دواتریش لە بوارەكانی یاسا و شەریعەت سێ بڕوانامەی ماستەرو دوو بڕوانامەی دكتۆرای بەدەست هێناوە.

سەرۆكایەتی زانكۆی گەشەپێدان بۆ كۆچی دوایی ئەم زاناو بیرمەندە كوردە پرسەنامەیەكی ئاڕاستە كردووە، كە تیایدا هاتووە:

بە بیستنی هەواڵی كۆچی دوایی زانای پایەبەرز و مامۆستای بواری یاساو شەریعەتی ئیسلامیی پڕۆفیسۆر د. مستەفا زەڵمی دڵ پڕ ئەسرین و خەفەت بووین، لەگەڵ رازی بوونمان بە قەدەری خوای گەورە و دڵنیابوونمان لەوەی كە مردن و ژیان لای خوای گەورەیە، بەڵام رۆشتنی زاناو بیرمەند و مامۆستایەكی وەك زەڵمی خەسارەتێكی گەورەیە بۆ زانستخوازانی كوردستان و كەلێنێك لە بوارە ئەكادیمی و زانستیەكەدا دروست دەكات كە پڕكردنەوەی ئەستەمە. ئێمە لە زانكۆو ناوەندە ئەكادیمییەكانی كوردستان زەرەرمەندی یەكەمین لە كۆچ كردنی ئەم سەرچاوە زانستییە مەزنە كە بەردەوام بە توێژینەوەو كتێبەكانی پاڵپشتی زانكۆكانی هەرێمی كوردستان و جیهانی ئیسلامیی بوو.

لە كۆتایی پرسەنامەكەشدا سەرۆكایەتی زانكۆی گەشەپێدان هیوا دەخوازن كە حكومەتی هەرێم گرنگییەكی تایبەت بە نوسراوو بابەتە زانستییەكانی پڕۆفیسۆر دكتۆر مستەفا زەڵمی بدەن و هەوڵی بڵاوكردنەوەو چاپكردن و وەرگێڕانی بدەن تا هەمووان لە فراوانی فیكرو مەعریفەتی ئەم زانا مەزنە بەهرەمەند بن.