ئەرشیفی هەواڵەکان

 

لە پێناو ژینگەیەکی تەندروست ، هەواری شار هەرەوەزێك رادەگەیەنێت

بەڕێوەبەرایەتی هەواری شاری سلێمانی، كە گەورەترین پاركی ناو شارەكان و روبەری سەوزایی سنووری شارەوانییەكانە، لە داوەتنامەیەكدا كە ئاڕاستەی دەزگا و دامەزراوەكانی شاری سلێمانی كردووە داوا لە هاوڵاتیان دەكات كە رۆژی یەكشەممە 22/5/2016 كاتژمێر 5 ی ئێوارە بەشداری بكەن لە هەرەوەزێكدا بۆ ژینگەیەکی تەندروست و بە مەبەستی ئاشنابوون بەم هەوارە رەنگینەو ناساندنی بە هاوڵاتیانی شار، ئەمە جگە لە ئامادەسازی پاركەكە بۆ پێشوازی لە میوانان و دانیشتوانی هەرێمی كوردستان.

زانكۆی گەشەپێدانی مرۆییش وەك دەزگایەكی ئەكادیمی گرنگی شاری سلێمانی داوەتی ئەم چالاكییە گرنگە كراوە، بۆیە سەرۆكایەتی زانكۆ داوا لە سەرجەم مامۆستایان و فەرمانبەرانی زانكۆ دەكات كە بەپێی توانا و گونجانی كاتیان لە رۆژو كاتی دیاریكراو بە خێزانی ئامادەی ئەم چالاكییە بن و بەشداربن لە خزمەتكردن بە جوانتركردنی شارەكەمان.

شایانی باسە پاركی هەواری شار گەورەترین پاركی شاری سلێمانی و هەرێمی كوردستانە، لە ساڵی 2004 یەكەم نەمامی تێدا چێنراوەو لەو كاتەوە تا ئێستا بە بەردەوامی كاری تێدا دەكرێت و ئێستاش قۆناغی یەكەمی ئامادە دەكرێت بۆ پێشوازی لە میوانان و هاوڵاتیانی شاری سلێمانی.